Money9: પ્રોપર્ટી હજુ પણ લોકો માટે રોકાણ કરવાનો પસંદગીનો વિકલ્પ છે. મોટાભાગના ઇન્વેસ્ટર્સ કોમર્શિયલ અને રેસિડેન્શિયલ પ્રોપર્ટીમાંથી કોની પસંદગી કરવી તેને લઇને કન્ફ્યુઝ થઇ જાય છે. બન્ને રોકાણના લોકપ્રિય વિકલ્પ છે. જો કે, રોકાણ માટે મૂડી, ભાડામાંથી કમાણી અને કેપિટલ એપ્રિસિએશનના મોરચે ઘણું અંતર હોય છે.
Money9નો સર્વે
Money9 અને RTI ઇન્ટરનેશનલના સર્વે અનુસાર દેશમાં કુલ 22 ટકા પરિવારો એવા છે, જે રોકાણ કરે છે. જ્યારે 18 ટકા ભારતીય પરિવાર એવા છે જે પ્રોપર્ટી કે જમીનમાં રોકાણ કરે છે. પ્રોપર્ટી કે જમીનમાં રોકાણ કરવાનો ટ્રેન્ડ ઇનકમના હિસાબે બદલાતો રહે છે. સર્વે અનુસાર 15 હજાર રૂપિયાથી ઓછી માસિક આવકવાળા પરિવારોમાં 10 ટકા જ જમીન કે પ્રોપર્ટીમાં રોકાણ કરે છે. 15 હજારથી 35 હજાર સુધી દર મહિને કમાનારા પરિવારોમાં આવા લોકોનો હિસ્સો વધીને 26 ટકા થઇ જાય છે. 35 હજારથી 50 હજાર રૂપિયા પ્રતિ માસ કમાનારા 26 ટકા પરિવાર પ્રોપર્ટીમાં ઇન્વેસ્ટ કરે છે. જ્યારે દર મહિને 50 હજાર રૂપિયાથી વધુ કમાનારામાંથી 32 ટકા પરિવાર પ્રોપર્ટી કે જમીનમાં રોકાણ કરે છે.
રેસિડેન્શિયલ પ્રોપર્ટીમાં જમીન, મકાન અને ફ્લેટ આવે છે. જ્યારે કોમર્શિયલ પ્રોપર્ટીમાં શોપિંગ કોમ્પ્લેક્સ, મોલ, ઓફિસ સ્પેસ, વેરહાઉસ એટલે કે ગોડાઉન, ડેટા સેન્ટર, હોટલ વગેરે સામેલ છે.
જો તમે રોકાણની દ્રષ્ટિએ પ્રોપર્ટી ખરીદવા માંગો છો તો રેન્ટલ યીલ્ડ ચેક કરવી જરૂરી છે. સરળ શબ્દોમાં કહીએ તો રેન્ટલ યીલ્ડનો અર્થ છે પ્રોપર્ટી પર ભાડા સ્વરુપે થતી આવક. દિલ્હી-મુંબઇ જેવા મહાનગરોમાં રેસિડેન્શિયલ પ્રોપર્ટીની રેન્ટલ યીલ્ડ ફક્ત 2 થી 3 ટકા છે. જ્યારે કોમર્શિયલ પ્રોપર્ટીના કેસમાં તે 7 થી 9 ટકા સુધી જાય છે. એટલે કે ભાડાની દ્રષ્ટિએ કોમર્શિયલ પ્રોપર્ટી ખરીદવી યોગ્ય નિર્ણય હોઇ શકે છે.
કેપિટલ એપ્રિસિએશનનો અર્થ છે કોઇ પ્રોપર્ટીના બજાર ભાવમાં કેટલી તેજી આવી છે. ઓનલાઇન રિયલ એસ્ટેટ પ્લેટફોર્મ Housing.com ના જણાવ્યા અનુસાર દેશના 8 મોટા શહેરોમાં વર્ષ 2015થી રેસિડેન્શિયલ પ્લોટની કિંમતોમાં વાર્ષિક 7 ટકાની તેજી આવી છે જ્યારે એપાર્ટમેન્ટની કિંમતો 2 ટકાના દરે વધી છે. રિસર્ચ ફર્મ Mordor Intelligence (મોર્ડોર ઇન્ટેલિજન્સ)ના જણાવ્યા અનુસાર, નાણાકીય વર્ષ 2022થી 2027 દરમિયાન કોમર્શિયલ પ્રોપર્ટી માર્કેટ વાર્ષિક આધારે અંદાજે 13 ટકાની ઝડપે વધવાનું અનુમાન છે.
કોમર્શિયલ પ્રોપર્ટીનો ફાયદો
અજમેરા રિયલ્ટી એન્ડ ઇન્ફ્રા લિમિટેડના ડાયરેક્ટર ધવલ અજમેરા કહે છે કે રેસિડેન્શિયલ પ્રોપર્ટીની તુલનામાં કોમર્શિયલ પ્રોપર્ટી ભલે મોંઘી પડતી હોય, પરંતુ તેમાં ભાડાની આવક પણ સારી થાય છે. કોમર્શિયલ પ્રોપર્ટીમાં મેઇન્ટેનન્સનો ખર્ચ, વાંરવાર ભાડુઆત શોધવા જેવી મુશ્કેલીઓ ઓછી આવે છે. લીઝ એગ્રીમેન્ટ આનું કારણ છે. કોમર્શિયલ પ્રોપર્ટી માટે લીઝ એગ્રીમેન્ટ લાંબાગાળા માટે બને છે. સાથે જ ભાડુઆત વારંવાર લોકેશન બદલવાનું પસંદ નથી કરતા જેનાથી ભાડું રેગ્યુલર મળતું રહે છે.
અજમેરા જણાવે છે કે દેશના મોટા શહેરોમાં રેસિડેન્શિયલ પ્રોપર્ટીમાં સારુ રિટર્ન પ્રાપ્ત કરી શકાય છે. આ ઉપરાંત, તેમાં રોકાણ કરવા માટે કોમર્શિયલ પ્રોપર્ટી જેટલી મુડીની જરૂર પણ નથી હોતી. ઘર ખરીદનારાએ જ નક્કી કરવાનું છે કે તે ઘર ખરીદે કે કોઇ એવી પ્રોપર્ટીમાં રોકાણ કરે જ્યાંથી સારી કમાણી થતી રહે. પ્રથમવાર પ્રોપર્ટીમાં રોકાણ કરનારા સામાન્ય રીતે રેસિડેન્શિયલ પ્રોપર્ટીને પસંદ કરે છે. કારણ કે તેમાં તેમને સુરક્ષા દેખાય છે. તો બીજી કે ત્રીજી વાર રિયલ એસ્ટેટમાં પૈસા લગાવવા પાછળનું મુખ્ય કારણ સારુ રિટર્ન મેળવવાનો ઇરાદો હોય છે. જેના કારણે આવા ઇન્વેસ્ટર્સ કોમર્શિયલ પ્રોપર્ટીને પ્રાથમિકતા આપે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો