MONEY9 GUJARATI: હમણા જ મુદિતે એક ક્રેડિટ કાર્ડ લીધું. પહેલા મહિનામાં તેણે આ કાર્ડથી કોઇ ખરીદી ના કરી પરંતુ બીજા મહિને તેણે 50 હજાર રૂપિયાનું એક લેપટોપ લીધું. હવે જ્યારે તેનું મંથલી બિલ જનરેટ થયું ત્યારે તેનું ક્રેડિટ કાર્ડ બેલેન્સ હતું પચાસ હજાર રૂપિયા. હવે તેણે ક્રેડિટ કાર્ડનું આખું બિલ ના ચુકવ્યું અને મિનિમમ ડ્યૂ એમાઉન્ટ ચુકવવાનું નક્કી કર્યું. સામાન્ય રીતે મિનિમમ એમાઉન્ડ ડ્યૂ એ આઉટસ્ટેન્ડિંગ બેલેન્સના 5 ટકા જેટલું રહેતું હોય છે. માટે મુદિતે દર મહિને 2500 રૂપિયા ચુકવવાનું ચાલું રાખ્યું. થોડા દિવસ પછી ખબર પડી કે તેની બાકી રકમ પર કાર્ડ કંપની માસિક 3.6 ટકા અને વાર્ષિક 52.86 ટકા સુધીનું વ્યાજ વસૂલે છે. હવે થયું એવું કે મુદિત વ્યાજ ચુકવતો ગયો અને બાકી રકમ ચુકવી શક્યો નહીં અને અંતે તે દેવાના ખપ્પરમાં ફસાઇ ગયો.
બેન્કિંગ એક્સપર્ટ અમિત કુમાર તનવર કહે છે કે તમે જ્યારે મિનિમમ ડ્યૂ એમાઉન્ટ પસંદ કરો છો ત્યારે તમારા બીજા મહિનાના બિલમાં જંગી વ્યાજ ઉમેરવામાં આવે છે. તમે 50 હજારની વસ્તુ ખરીદ્યા બાદ જો તમે મિનિમમ ડ્યૂ એમાઉન્ટ ભરી હશે તો બાકીની રકમ પર આગામી 35 દિવસ સુધી વ્યાજ ચડતું જશે.
બીજા બિલમાં મિનિમમ એમાઉન્ટ ઘટ્યા બાદ તમે જો બીજી વધુ ખરીદી કરી છે તો તે રકમ પણ બાકી રકમમાં ઉમેરાઇ જશે. તેનો મોટો ગેરફાયદો તે પણ છે કે તમે જે તારીખે ખરીદી કરો છો તે તારીખથી જ તમારા પર વ્યાજ લાગવાનું શરૂ થઇ જશે અને નવી આઉટસ્ટેન્ડિંગ રકમ બનશે. હવે મિનિમમ ડ્યૂ આ વ્યાજ સાથેની આઉટસ્ટેન્ડિંગ રકમ મુજબ આવશે.
માટે માત્ર મિનિમમ ડ્યૂ એમાઉન્ટ ભરવું કોઇ પણ સંજોગોમાં સલાહભર્યું નથી. તે તમારી આર્થિક સ્થિતિ બગાડી શકે છે. ચાલો તેના વિશે આપણે વિગતવાર વાત કરીએ.
જ્યારે તમારું ક્રેડિટ કાર્ડ બિલ જનરેટ થાય છે ત્યારે તમારી પાસે પેમેન્ટ કરવા માટે બે ઓપ્શન હોય છે. એક હોય છે ટોટલ આઉટસ્ટેન્ડિંગ એમાઉન્ટ અને બીજો મિનિમમ એમાઉન્ટ ડ્યૂ, જે સામાન્ય રીતે કુલ આઉટસ્ટેન્ડિગં રકમના 5 ટકા જેટલું હોય છે. જ્યારે લોકો પાસે પૈસા નથી હોતા ત્યારે તેઓ મિનિમમ એમાઉન્ટ ડ્યૂ જ પે કરે છે. જો તમે નિયમિત રીતે આવું કરતા હો તો આમાં ફાયદો ઓછો અને નુકસાન વધુ છે. તમે મુદિતના કિસ્સામાં તે જોઇ જ લીધું છે.
હવે આપણે મિનિમમ એમાઉન્ટ ડ્યૂના ફાયદાની વાત કરીએ. તેનાથી તમે તમારી ક્રેડિટ એક્ટિવ રાખી શકો છો. તેનો અર્થ તે થયો કે તમે કાર્ડની બચેલી ક્રેડિટનો ઉપયોગ કરી શકો છો. બીજો લાભ તે છે કે બેન્ક તમને ડિફોલ્ટ નહીં માને અને તમારો ક્રેડિટ સ્કોર સેફ રહેશે. તેનો બીજો એક ફાયદો તે પણ છે કે તમારા પર લેટ પેમેન્ટ ફી નહીં લાગે.
હવે વાત કરીએ નુકસાનની.. તો તેમાં તમારે ખૂબ જ ઉંચું વ્યાજ આપવું પડે છે અને તેની સામે આઉટસ્ટેન્ડિંગ એમાઉન્ટ એટલી બધી ઘટતી નથી. આઉસ્ટેન્ડિંગ એમાઉન્ટ ખુબ જ વધુ હોવાથી તમારી ક્રેડિટ લિમિટ પણ ઘટતી જશે. એટલે થશે એવું કે તમે પછી મોટી ખરીદી પણ નહીં કરી શકો અને જે સપના જોઇને તમે ક્રેડિટ કાર્ડ લીધું તું તેનો તમે લાભ નહીં લઇ શકો.
વ્યાજ દર અલગ અલગ કાર્ડ માટે અલગ અલગ હોય છે. મોટા ભાગના કાર્ડમાં માસિક વ્યાજ દર 3.4 ટકાથી લઇને 3.8 ટકા સુધીનો હોય છે અને તેના આધારે વાર્ષિક દર 42 ટકાથી 53 ટકા સુધીનો થાય છે. દાખલા તરીકે, Axis Bank Ace Credit Card પર monthly interest rate 3.6 ટકા છે અને annually તે 52.86 ટકા છે. તેવી જ રીતે HDFC Millennia Credit Cardમાં તે માસિક 3.6 ટકા અને વાર્ષિક 43.2 ટકા છે. માટે જ કાર્ડથી ખરીદી ખૂબ કરો પણ મિનિમમ એમાઉન્ટ ડ્યૂના વિકલ્પથી દૂર રહો.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો