MONEY9: રિટર્ન ઑન ઈક્વિટી એટલે કે ROE શું છે અને રોકાણ કરવા માટે ROEની મદદથી કેવી રીતે સારી કંપનીઓની પસંદગી કરવાનું કામ સરળ થઈ જાય છે, તે સમજીએ.
ROEનો ઉપયોગ કોઈ કંપનીનું પર્ફોર્મન્સ કેવું છે અને તે કેટલી નફાકારક છે તેનું અસરકારક માપ કાઢવા માટે ROEનો ઉપયોગ થાય છે. ઊંચો ROE ધરાવતી કંપની દર્શાવે છે કે, તેણે શેરધારકોના પૈસાનો કેટલી અસરકારકતાથી ઉપયોગ કર્યો છે. જો કોઈ કંપનીએ સતત ઊંચો ROE જાળવી રાખ્યો હોય તો તેનો અર્થ એ થયો કે, તેના પર ઓછું દેવું છે અને વ્યાજનો ખર્ચ પણ ઘણો ઓછો છે.
ROEના ફાયદા ROEથી કંપની કેટલી વૃદ્ધિ કરશે તેની તો ખબર પડે જ છે, પરંતુ સાથે સાથે આગામી સમયમાં કંપની ડિવિડન્ડ આપશે કે નહીં તે સમજવામાં પણ મદદ મળે છે. આ સિવાય ROE દ્વારા એ પણ જાણી શકાય છે કે, શેરધારકોને ચૂકવણી કરવા માટે કંપની પાસે પર્યાપ્ત ભંડોળ છે કે નહીં.
ROEની ગણતરી હવે, એ પણ સમજી લઈએ કે, ROEની ગણતરી કેવી રીતે થાય છે. તો, ROE શોધવાનું કામ પણ સરળ છે. તેના માટે સૌથી પહેલાં તમારે કંપનીની નેટ ઈનમકનો આંકડો મેળવવો પડશે. કંપનીની કુલ આવકમાંથી વ્યાજ, કંપનીના ખર્ચા, ટેક્સ અને અન્ય ખર્ચા બાદ કરો એટલે કંપનીની નેટ ઈનકમનો આંકડો મળી જશે. હવે, નેટ ઈનકમના આંકડાનો શેરધારકોની ઈક્વિટી વડે ભાગાકાર કરો અને જે ફિગર મળે તે છે ROE.
ROEનું ઉદાહરણ આપણે શેરબજારમાં લિસ્ટેડ કંપની ટીડી પાવર સિસ્ટમનો દાખલો લઈએ તો, તેનો ROE 13 ટકા છે. આનો અર્થ એ થયો કે, શેરધારકોએ રોકેલા પ્રત્યેક 1 રુપિયાના રોકાણ પર કંપનીએ 13 પૈસાનો નફો રળ્યો છે. આ કંપની જે સેક્ટરની છે, તે સેક્ટરનો સરેરાશ ROE 9.9 ટકા છે. એટલે કે, આ સેક્ટરની અન્ય કંપનીઓની સરખામણીએ આ કંપનીનું પર્ફોર્મન્સ ઘણું સારું છે અને ભવિષ્યમાં પણ તે વૃદ્ધિમય પ્રદર્શન જાળવી રાખે તેવી શક્યતા છે.
શું ધ્યાન રાખશો કોઈ કંપની સારી છે કે નહીં તે જાણવા માટે ROE એક મહત્ત્વપૂર્ણ પરિબળ છે પરંતુ તેના સિવાય પણ અન્ય ઘણા આંકડા કંપનીની મજબૂતી કે નબળાઈ છતી કરે છે. આથી, રોકાણ કરતાં પહેલાં ROE સિવાય અન્ય પરિબળોને પણ ધ્યાનમાં લેવા જોઈએ અને પૂરતું રિસર્ચ કર્યા પછી જ શેરબજારમાં રોકાણ કરવું જોઈએ.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો