Money9 Gujarati:
Per Capita Income Growth Rate: ચાલુ નાણાકીય વર્ષ (2023-24)માં માથાદીઠ આવકનો વૃદ્ધિદર છેલ્લાં 21 વર્ષમાં સૌથી નીચો રહેવાનો અંદાજ છે. ચાલુ નાણાકીય વર્ષમાં માથાદીઠ આવકમાં 7.9 ટકા વૃદ્ધિ થવાનો અંદાજ છે. માથાદીઠ આવકની ગણતરીમાં નાણાકીય વર્ષ 2019-20 અને 2020-21ને બાકાત રાખ્યા છે. 2020-21માં કોરોના ત્રાટક્યો હતો જ્યારે 2019-20માં અર્થતંત્રની ગતિ ધીમી પડી હતી. આ બંને વર્ષમાં માથાદીઠ આવકનો વૃદ્ધિદર 7.9 ટકાની નીચે ગયો હતો. ગિની કોફિશિએન્ટ (gini coefficient)ની ગેરહાજરીમાં માથાદીઠ આવકને વ્યાપકપણે દેશની સમૃદ્ધિનું સૂચક માનવામાં આવે છે.
એક અંદાજ મુજબ, 2023-24માં માથાદીઠ આવક વધીને 1,85,854 રૂપિયા થવાની શક્યતા છે, જે અગાઉના વર્ષમાં 1,72,276 રૂપિયા હતી. GDPમાં વધારો થવા છતાં માથાદીઠ આવકનો વૃદ્ધિદર નીચો રહેવાની શક્યતા છે. વર્તમાન નાણાકીય વર્ષ દરમિયાન વાસ્તવિક ગ્રોસ ડોમેસ્ટિક પ્રોડક્ટ (GDP)નો વૃદ્ધિ દર 7.3 ટકા રહેવાનો અંદાજ છે. અગાઉના પ્રથમ પ્રારંભિક અંદાજમાં 6.5 ટકા વૃદ્ધિની આગાહી કરવામાં આવી હતી.
2019-20માં માથાદીઠ આવકનો વૃદ્ધિ દર ઘટીને 5.1 ટકા થયો હતો, જે અગાઉના નાણાકીય વર્ષમાં 9.3 ટકા હતો. 2020-21માં એટલે કે કોરોના સમયગાળા દરમિયાન માથાદીઠ આવકમાં 4 ટકાનો ઘટાડો થયો હતો. આ સિવાય 21 વર્ષ દરમિયાન માથાદીઠ આવકમાં વૃદ્ધિ દર 7.9 ટકાથી વધુ રહ્યો છે. 2002-03માં માથાદીઠ આવકનો વિકાસ દર માત્ર 6.2 ટકા હતો.
2023-24માં માથાદીઠ આવકના નીચા વૃદ્ધિ દરનું એક કારણ નીચા GDP Deflators છે. નોમિનલ GDP ગ્રોથ પણ ઘટીને 8.9 ટકા થયો છે, જે અગાઉના વર્ષમાં 16.1 ટકા હતો. બજેટમાં અનુમાન લગાવવામાં આવ્યું હતું કે 2023-24 દરમિયાન GDP વૃદ્ધિ દર 10.5 ટકા જેટલો નજીવો રહેશે. નોંધનીય છે કે માથાદીઠ આવક વર્તમાન ભાવો પ્રમાણે છે. મોટાભાગના GDP Deflators જથ્થાબંધ ભાવો (હોલસેલ પ્રાઈસ ઈન્ડેક્સ) આધારિત ફુગાવામાંથી લેવામાં આવે છે.
2023-24ના ડિસેમ્બર સુધીના મોટાભાગના મહિનામાં જથ્થાબંધ ફુગાવાનો દર શૂન્યથી નીચે રહ્યો છે. તેનું એક કારણ કર્મચારીઓની આવક પણ ગણી શકાય. માથાદીઠ આવક ચોખ્ખી રાષ્ટ્રીય આવક (NNI) પર આધારિત છે.
બેંક ઓફ બરોડાના મુખ્ય અર્થશાસ્ત્રી મદન સબનવીસે જણાવ્યું હતું કે નાણાકીય વર્ષ 2023-24 (કોવિડ અને આસપાસના વર્ષો સિવાય)માં માથાદીઠ આવકમાં લઘુત્તમ વૃદ્ધિ દરનું મુખ્ય કારણ ચોખ્ખી રાષ્ટ્રીય આવકમાં નીચી વૃદ્ધિ છે. તેમણે કહ્યું કે, “આ નીચા જથ્થાબંધ ફુગાવાના દરને કારણે થયું છે, જે મોટાભાગના મહિનામાં શૂન્યથી નીચે છે. ફુગાવાના દરમાં ઘટાડો થવાના હકારાત્મક સંકેતની આ નકારાત્મક અસર છે. જીડીપીમાં વાસ્તવિક વૃદ્ધિ 7.3 ટકા રહી છે, જે વધુ સારો આંકડો છે.”
જો આંતરરાષ્ટ્રીય સરખામણી કરવામાં આવે તો માથાદીઠ જીડીપી વૃદ્ધિ વર્તમાન ભાવે જોવા મળે છે. આ મુજબ, માથાદીઠ આવકમાં વૃદ્ધિ દર ચાલુ નાણાકીય વર્ષમાં ઘટીને 7.9 ટકા રહેવાનો અંદાજ છે, જે અગાઉના નાણાકીય વર્ષમાં 14.9 ટકા હતો.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો