Money9 Gujarati:
Cost of Living: છેલ્લાં 10 વર્ષમાં લોકોની આવક ભલે બમણી ના થઈ હોય, પરંતુ જીવન જીવવાનો ખર્ચ બમણો થઈ ગયો છે. ઘઉં, ચોખા, કઠોળ, દાળ, લોટ જેવા ખાદ્ય પદાર્થો, ઘરવખરીનો સામાન, વીજળી, તાજા ઉત્પાદનો, ઈંધણ, કપડા, પરિવહન, ઘરેલુ ઉપકરણો, વાહનો, મોબાઈલ, ઈન્ટરનેટ, ભણતરનો ખર્ચ અને દવાદારૂનો ખર્ચ બમણો થઈ ગયો છે.
સાબુ અને ટૂથપેસ્ટ જેવા પેકેજ્ડ ઘરગથ્થુ સામાનની સાથે સાથે પેકેજ્ડ ફૂડ આઈટમ્સની કિંમત 2012થી અત્યાર સુધીમાં બમણાથી વધુ થઈ ગઈ છે. સામાન્ય માણસ પર ખર્ચનો બોજ સૌથી વધુ વધ્યો છે, કારણ કે રસોડાના વાસણો અને અન્ય ઘરગથ્થુ ઉત્પાદનો, ખાણીપીણીનો સામાન તેમજ ફાસ્ટ મૂવિંગ કન્ઝ્યુમર ગૂડ્ઝ (FMCG) ઉત્પાદનોના ભાવમાં ધરખમ વધારો થયો છે.
ઉદ્યોગોના સંગઠન CII અને બોસ્ટન કન્સલ્ટિંગ ગ્રૂપ (BCG)ના રિપોર્ટમાં જાણવા મળ્યું છે કે, FMCG પ્રોડક્ટ્સ પછી કોલેજની ફીમાં સૌથી વધુ વધારો થયો છે. રાહતની વાત એ છે કે છેલ્લા એક દાયકામાં ઈન્ટરનેટ પ્લાન, મોબાઈલ ફોન, લોકલ ટ્રાન્સપોર્ટ અને નવા વાહનોના ભાવમાં સૌથી ઓછો ફેરફાર થયો છે.
BCG દ્વારા 10 વર્ષના સમયગાળામાં ઘરગથ્થુ સામાન અને સેવાઓના ભાવમાં થતા ફેરફારની નોંધ કરવામાં આવે છે. તેમાં કોલેજ ફી અને ચોખા, કઠોળ, લોટ, હોમ કેર પ્રોડક્ટ્સ, વીજળી, ફ્રેશ પ્રોડક્ટ્સ, ઈંધણ, કપડાં તેમજ રસોડાની ચીજ-વસ્તુઓનો સમાવેશ થાય છે.
BCGના ચેર ઓફ પ્રેક્ટિસીસના MD અને વરિષ્ઠ પાર્ટનર અભિક સિંઘીના જણાવ્યા અનુસાર, અન્ય શ્રેણીઓની સરખામણીમાં FMCG ઉદ્યોગમાં કિંમતમાં સૌથી વધુ ઉછાળો આવ્યો છે. જેના લીધે FMCGનો વોલ્યુમ ગ્રોથ એટલો મજબૂત રહ્યો નથી. અગ્રણી કન્ઝ્યુમર ગુડ્સ કંપનીઓએ વોલ્યુમ ગ્રોથને બદલે નફો કમાવવા પર ધ્યાન કેન્દ્રિત કર્યું છે.
ભારતીય પરિવારોએ 2023માં બિસ્કિટ, સાબુ, શેમ્પૂ, ટૂથપેસ્ટ, જામ અને ફ્લોર ક્લીનર વગેરે જેવી ઉપભોક્તા ચીજવસ્તુઓ પર 5.4 લાખ કરોડ રૂપિયા ખર્ચ્યા છે. 2019થી આ ખર્ચ અંદાજે 45 ટકા વધ્યો છે.
2014થી શહેરી બજારોમાં એકંદરે A, B, C, D અને E તરીકે વિભાજિત વિવિધ સામાજિક-આર્થિક વર્ગોમાં FMCG ઉત્પાદનોનું વેચાણ ઘટી રહ્યું છે. BCGના રિપોર્ટમાં રિસર્ચ કંપની કંતારના સ્થાનિક પેનલ ડેટાને ટાંકીને નોંધવામાં આવ્યું છે કે ગ્રામીણ બજારોમાં વેચાણ 2007 અને 2023ના સમયગાળા વચ્ચે કાં તો વધ્યું છે અથવા સ્થિર રહ્યું છે.
BCGએ વર્તમાન કેલેન્ડર વર્ષ માટેના ડેટાને ટાંકીને જણાવ્યું છે, ભારતના સુખી-સંપન્ન પરિવારોએ FMCG અને કાર પાછળ ખર્ચ વધાર્યો છે. વાર્ષિક 10 લાખ રૂપિયાથી વધારે આવક ધરાવતા સમૃદ્ધિ પરિવારોનો હિસ્સો 16 ટકા છે અને તેમણે FMCG સામાન પાછળ 32 ટકા ખર્ચ કર્યો છે, જ્યારે કાર પાછળ 90 ખર્ચ કર્યો છે.
BCGના જણાવ્યા પ્રમાણે, જે પરિવાર દર વર્ષે 10,00,000 રૂપિયાથી વધારે કમાણી કરે છે તેમને સમૃદ્ધ પરિવાર ગણવામાં આવે છે. આ ગ્રાહકો રજાઓ અને કપડાં પાછળ પણ મોટા પ્રમાણમાં ખર્ચ કરે છે. 1,50,000થી 10,00,000 રૂપિયાની વાર્ષિક કૌટુંબિક આવક ધરાવતા પરિવારો મધ્યમ આવક હેઠળ આવે છે. આ પરિવારો FMCG ઉત્પાદનો પાછળ 60 ટકા ખર્ચ કરે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો